العنوان : إنت ليه نسيت بالساهل كدة ؟!
المؤلف والكـاتب : أحمد عادل .
التـاريخ : 27\7\2013 .
النوع : رسالة سياسية وإنسانية .
التصنيف : السياسة والقانون .
---------------------------
إنت ليه نسيت بالساهل كدة ؟!
- جميع القنوات الـ موجودة دلوقتي والـ انت بنفسك ..
كنت بتقول عليها فلول وممولين ودعاة فتنة وكذابين وولاد ستين كلب ..
دلوقتي إنت بنفسك برضو الـ بتصدقهم وبتقول عليهم ..
جامدين جداً وبينشروا الحقايق فعلاً وما بقيتش بتسمع غير منهم !!!
( مفيش في كل ده أي حاجة تحسسك بإنك غلط ؟! )
- قناة الجزيرة الـ كانت بترصد كل أخبارك أيام الثورة ..
وما بتجيبش النافورة بتاعة الميدان ولا كوبري قصر النيل الهادي ..
زي بقية قنوات إعلام العار الـ موجودة بكل أسف عندنا ..
وما كنتش بتشوف وتصدق أي قناة تانية غيرها وقتها ..
علشان المصداقية بتاعتها كبيرة وما بتفبركش أي حاجة ..
دلوقتي بتقول عليها خاينة وكذابة عشان جايبة المحيط المعارض للعسكر ..
والـ كل القنوات التانية برضو مش جايبين ولا قايلين أي حاجة عنه ..
( برضو لسا ما دخلش جوا قلبك أي شك بحقيقة موقفك ؟! )
- الشرطة الـ قتلت وخربت وسرقت ونهبت وقامت لأجلها ثورة 25 يناير ..
دلوقتي إنت واقف جنبهم ، كتفك في كتفهم وبتطالب بنفس مطالبهم ..
ومقتنع انك ماشي في الطريق الصح وإنك كدة ما خنتش دم شهداء 25 ..!!
متأسف ، بس إنت ليه قافل دماغك بقفل من حديد وما بتفكرش ؟!!
( الـ يبيع مبادئه ، يبيع شرفه وكرامته وكل وأي حاجة تاني في حياته )
- العسكر من الستينات وهو فيه عرق الخيانة ..
انقلابه على محمد نجيب ، سيطرته على الدولة بالقمع وإلغاء كل الأحزاب ..
خيانته العظمى وتسببه في نكسة 67 بإعلانه أخبار كاذبة على الإعلام ..
مجزرة ماسبيرو ، مجزرة بورسعيد ، مجزرة العباسية ..
مجزرة محمد محمود ، مجزرة مجلس الوزراء ، مجزرة الحرس الجمهوري ..
مجزرة ميدان النهضة ، مجزرة الأزهر ، وأخيراً مجزرة منصة رابعة العدوية ..
حتى الشيخ عماد عفت ربنا يرحمه ، كان مين الـ قتله ؟!!
ودلوقتي روحت تفوضله بنفسك وتقول إنه الأنسب وإنه الأصح ؟!!
ليه بتنسى أو بتتناسى مبادئك بكل سلبية وانحطاط كدة ؟!!
( طبعاً إنت دلوقتي غير إنت أيام ثورة 25 ، ومؤكد الجيش كذلك )
- لما تروح تقف تلاقي نفسك واقف جمب ..
عمرو مصطفى وأحمد سبايدر وتوفيق عكاشة والأنثى بتاعته ..
وإلهام شاهين ولميس الحديدي وعمرو أديب وقائمة العار كلها ..
الـ إنت دونت أساميها إسم إسم وحطيتهم فيها بنفسك ..
بذمتك يا أخي مش مكسوف على دمك من الـ بتعمله ده ؟!!
ياريت تبطل عناد وتبطل الفهلوة الحقيرة الـ بدأت تمحي آدميتك دي ..
( فلول دول وحزب وطني ونظام ملعون قديم ولا لا ؟! )
- أمن الدولة بدأ يرجع ، والشرطة رجعت لعوايدها القديمة تاني ..
ولما هيجي اليوم وتتنفخ ، مش هتلاقي ساعتها الـ ينجدك ..
علشان وقتها انت قدامهم عملت ثورة وطلعت عين أمهم ، وفشلت ..
وهتاخد فوق دماغك وهتلبس في كل أنواع الضرب والتعذيب لو نطقت تاني ..
لإنك جبتهم برضو وفوضتهم بإرادتك الكاملة فـ إلبس بقى يا حلو .. :)
ولو مفكر إن الشرطة بقت جميلة والعسكر بقى حلو وأمور ..
إبقى تعالى كل فشاااار يا أهبل !!
( ضميرك أخباره إيه يا سعادة المفوض ؟! )
- شوف مين الـ نازل يفوض العسكر وِعد كدة كام فصيل سياسي ثوري هناك ..
ثم هو مين بتوع تمرد دول ؟! وازاي ظهروا مرة واحدة بسرعة كدة ؟!
وفي خلال شهرين خلصوا الدنيا وفي خلال يومين مرسي اتشال ؟!
وكل مؤسسات الدولة وقفت معاهم وأيدتهم وإنت بتتفرج بكل هبل ؟!
( لسا ما شكيتكش مجرد الشك في حقيقة المشهد حواليك ؟! )
- اللعبة ليست " مرسي " و " الإخوان " و " غلق القنوات " ..
لا يا سيدي الفاضل ، مش زي ما انت فاهم خالص :)
اللعبة أوسخ من كدة بكتير جداً فوق ما انت متخيل ..
الإخوان ومحمد مرسي مجرد خيط بيخليك تمشي على أساسه ..
ويفهمك من خلاله إن هو كده بيعملك الصح والـ فيه الخير ليك ..
وبيطبقلك تماماً الانت أساساً عايزه وبتطالب بيه ..
اللعبة دي مدروسة كويس جداً وبيتم تطبيقها بحرفية كاملة ..
( مش حاسس إن إنت بقى يتلعب بيك زي عروسة الماريونت ؟! )
- لن أفكر أبداً بالنزول مع من قتل من قبل ..
( الشرطة ، العسكر ، الفلول ، النظام القديم ) كل هؤلاء إلى الجحيم ..
من فضلك تذكر وشاهد الأحداث وراقبها من على كل القنوات الأخرى ..
وفكك حبة من قنوات الفلول وحاول تخليك محايد شوية وإنت توصل للحقيقة ..
( ولو إن دي مش فتنة والحق باين والباطل باين جداً على فكرة )
- حضرتك دي مش حرب مع إسرائيل عشان يتعمل في الناس كدة ..
إحنا كلنا مصريين ، وكل الـ في الميادين دول مصريين أباً عن جد ..
المعارض للعسكر ليس بإخواني أو خائن أو إرهابي وهو مصري وفقط ..
ولكي تتأكد من ذلك ، انزل إلى اعتصاماتهم بنفسك وتأكد من هوياتهم ..
وتبين من الـ بيتقال عنهم في وسائل الإعلام الـ عاهرة الـ عندنا ..
( عن تقطيع الأصابع وسرقة الشباشب أتحدث يا سيدي الفاضل )
- بكل أسف تفكيرنا الدنيوي بقى أكبر بكتير من تفكيرنا في الآخرة ..
ومش قادر تتمسك بنفس مبادئك بحجة أنه لا تصالح مع الإخوان ..
ولكن أنا مش هكلمك أكتر من كدة وأوجع دماغي وقلبي معاك ..
أنا هقولك آيات ربنا بس ، عل وعسى تفوق وترجع لآدميتك ..
قال تعالى :
" ومن يقتل مؤمناً متعمداً فجزاؤه جهنم خالداً فيها وغضب الله عليه ولعنه وأعد له عذاباً عظيماً " ..
شكراً ..... :)
---------------------------
للتواصـــل
مدونتي الخاصة :
: صفحتي على
FaceBook : https://www.facebook.com/Mc.AhMaD
Twitter : https://twitter.com/Mido_7Cr
صفحة الاستفسارات :
Ask.fm : http://ask.fm/MCAhmad
رقم الهاتف الجوال :
00201150109037
البريد الإلكتروني :
Mody.0007@Hotmail.Com
Mody.0007@Ymail.Com
للمحآدثة الفورية عبر الـ WhatsApp :
+201150109037
ليست هناك تعليقات:
إرسال تعليق