العنوان : يعني إيه يا عمار ؟! .
المؤلف والكـاتب : أحمد عادل .
التـاريخ : 6\5\2014 .
النوع : خـاطرة .
التصنيف : الأدب النثري .
---------------------------
يعني إيه يا #عمار ؟!
- يعني مش هنصحى على صوت بعض كل يوم الصبح واحنا نازلين وتتأخر عليا انت والنقيش وأقعد أزعق فيكم وأحلف بعد كدة أمشي وأسيبكم تنزلوا براحتكم فتصالحوني وتاخدوني على قد عقلي وتضحكوا عليا بكلمتين حلوين وأنا أرجع راضي تاني وأعمل عبيط ؟!
- ولا هنهزر ونرخم على سواقين الميكروباص ونستعجلهم بهزار فنرسم الضحكة على وشوشهم ونسلي نفسنا ونسليهم كل يوم واحنا في الطريق ؟!
- عم سلامة بتاع البطاطس مش هيوحشك ؟! ولا لما كنت تحب تتلكم فتيجي تطلب معاية واحد سوري من عند عم علي وتحبس من عند الشيخ محمود بتاع السوبر ماركت ؟!
- طب واللمبي -عم تلوث- الـ كنت بتريق عليه وانتوا واقفين بتاكلوا من عنده وأقوم جايب أنا كمان واحد مربى وأقعد آكل معاكم فتبصولي وتضحكوا ؟!
- مصطفى وباسم وأحمد ومحمود وحمزة وغريب وأشرف وعثمان وعمرو وإسلام وإيهاب وإبرام ونور وماجد وبقية شلة الكلية كلها ، مشيت كدة من غير حتى ما تسلم عليهم ؟!
- الدكاترة ، المحاضرات ، مكانك في المدرج ، المكتبة ، الكافتيريا ، اللاب بتاعك ، طرابيزة الرسم ، كشكولك ، لوحك ، مسطرتك .. مفيش حاجة في دول هتوحشك ؟!
- مترو ولا دائري ، دائري ولا مترو ، المشكلة الأزلية بتاعة كل يوم من السنة الفاتت لحد ما اتفقنا يبقى مترو في الشتا ودائري في الصيف .. فاكر الكلام ده طيب ولا نسيت ؟!
- اسكت ، مش النقيش واصحابه اكتشفوا محل عصير جامد فوق في المقطم وكانوا ناويين ياخدونا ويشربونا منه هناك ؟!
- واصحابنا الـ في عين شمس والقاهرة الـ كنا لاجئين عندهم ، مش هنروح نشوفهم سوا تاني ؟!
- تغيير الجو والخروج على المحطة والعشوة الأساسية بتاعة كل يوم خميس مع الشلة كلها ، خلاص خدت القرار وبطلتها ؟!
- وقعدة القهوة والفرجة على الماتشات ولعب الطاولة مع الرفاعي والنقيش ، وطلب السحلب المعتاد بتاعك أخيراً زهقت منه ؟!
- المصيف الـ كان نفسنا نطلعه سوا ( مطروح ، إسكندرية ، راس البر ، شرم ولا الغردقة ) أكيد ده بقى على الأقل كان نفسك فيه ؟!
يعني إيه يا #عمار ؟!
- خلاص قررت مش هتستقبلني عندك في البيت وأنا راجع من الكلية في يوم أجازتك ولا هتغديني من إيد طنط تاني ؟!
- مش هتبعتلي أسامي الأفلام الجامدة الـ نازلة وتقعد تنزلها معاية عشان سهرة الأجازة عند أبو زهرة ؟!
- طب وماتش الكورة بتاع آخر الإسبوع الـ قلتلنا نعمل حسابك فيه ، إيه هنلعب ناقصين ؟!
- ولا المشروع الـ هيتسلم كمان أسبوعين وكلمتني عشان آجيلك وتاخد رأيي فيه ، ده كمان رميته ولا عملت فيه إيه ؟!
- أقلام التحبير الـ طلبتها مني كنت شايلهالك معاية في الشنطة عشان أول ما أقابلك يوم الحد أديهالك .. بس انت الـ ما جيتش الصبح ؟!
- مش على أساس هنخلي النقيش وأبو زهرة يعلمونا السواقة لحد أما نبقى متمكنين منها عشان نروح نطلع الرخصة سوا ؟!
- استنى ، انت مش كنت مواعدني هتيجي وتجيب النقيش في إديك يوم الخميس عشان نتفرج على Shutter Island ونتفق على يوم نروح فيه البسين لما ترجع -المُدَمرَة- بتاعة النقيش ؟!
- وبالنسبة لخروجاتنا في العيد ( الفيلا والشوي واللعب والصور والضحك بعد الصلاة والجري والمسخرة والتنطيط ) ؟!
- بلاش ، هو احنا مش اتفقنا نحوش كويس عشان أول الشهر ندخل سوا فيلم Spider-Man الجديد ؟!
- آه تمام عندك حق ، أنا استندلت وروحت دخلته مع اصحابي في الكلية يوم الخميس الفات .. طب وبالنسبة للانت عملته ده أسميه إيه ؟!
يعني إيه يا #عمار ؟!
- طب ومشروع شركتنا الهندسية العملاقة الـ كنا هنفتحها ونديرها ونكبرها سوا .. إيه ، كنت بتسرح بينا وخلاص بعت كل ده ومشيت ؟!
- وحلم السفر الـ كان يادوب على قدنا ( تركيا ، ماليزيا ، ألمانيا ، إيطاليا ، أمريكا ، قطر ، الإمارات ) ، ما تقوليش خلاص عنه استغنيت ؟!
- ماشي ، كنا بندرس مع نفسنا وناخد كورسات وبندور على منح عشان نسافر نتعلم برة البلد دي بس مين قال إن احنا اتفقنا السفر يبقى فردي وبالطريقة دي ؟!
- دلوقتي مين هيبقى موجود مكانك عشان يجيب طلبات البيت لما عبد الرحمن يبقى في الشغل وعمر يبقى برة البيت ؟!
- مش كانت شخصية المهندس عبد الله النجار عاجباك انت وبقية الشباب وكنت عايز تتعرف عليه ، وأنا وعدتك إني هجيبه هنا وهعرفكم عليه أول ما ينزل مصر ؟!
- نقاشاتنا واختلافاتنا السياسية والفكرية وزعيقنا لبعض وخناقنا وزعلنا وقفشاتنا ، كل ده بح خلاص مش هيتكرر ؟!
- مين هيشجعني على كتاباتي وهيتابعني باللايكات على البروفايل بتاعي ، ويدخل يقولي على الـ Notes " بحبك لما تكون رايق " ؟!
- أكيد ما نسيتش السفرة بتاعتي الـ جمعتنا ياما في أنصاص الليالي ، واحنا بنحل الشيتات ونذاكر الامتحانات سوا يا غالي ؟!
- ولا الألش الرخيص بتاعك ، لما كنت تسمعني أقول " وأنا مالي !! " فـ ترد تقول " مالي ولا نيجيريا " .. وأبصلك باستغراب وأضحك من قلبي عليك ؟!
- ولا لما كنتوا تتريقوا عليا لما فرهضت منكم بعد تدريب الكونغ فو ، وأنا أرد وأتريق عليكم عشان بتدربوا عن واحد دماغه مسافرة وهربانه منه فتضحكوا ؟!
- ولا لما كان يحصل مشكلة فأتصل بيك وأكلمك وآجي أحكيلك عن الـ شايله جواية وأشكيلك همي فتواسيني وتخفف من الـ عليا وتنصحني ؟!
يعني إيه يا #عمار ؟!
مش هشوف رقمك يرن عليا ؟!
ولا هتهزر معانا ؟!
ولا هناكل ونشرب عصير سوا ؟!
ولا هنروح الكلية مع بعض ؟!
ولا هنخرج على المحطة بالليل ؟!
ولا هنقعد على القهوة نتفرج على الماتشات ؟!
ولا هنلعب طاولة وشطرنج ودومنة ؟!
ولا هنطلع المصيف ؟!
ولا هتستقبلني في البيت ؟!
ولا هتبعتلي أسامي الأفلام الجديدة ؟!
ولا هنلعب كورة معاك ؟!
ولا هتاخد رأيي في المشاريع ؟!
ولا هتطلب مني حاجة ؟!
ولا هنتعلم السواقة وناخد الرخصة ؟!
ولا هتجيلي الشقة ؟!
ولا هنروح البسين ؟!
ولا هنخرج في العيد ؟!
ولا هندخل سينما ونتفرج على فيلم جديد ؟!
ولا هنأسس ونكون شركتنا ؟!
ولا هنسافر نتعلم برة ؟!
ولا هتجيب طلبات البيت ؟!
ولا هتقابل المهندس عبد الله النجار ؟!
ولا هنتناقش في سياسة وفكر تاني ؟!
ولا هتشجعني على كتاباتي ؟!
ولا هنقعد نحل ونذاكر ونرسم على طرابيزة السفرة بتاعتي ؟!
ولا هتسمعنا الألش بتاعك ؟!
ولا هتتريقوا عليا ؟!
ولا هتلعب جيم وكونغ فو ؟!
ولا هاجي أحكيلك وأشكيلك عن أي حاجة تاني ؟!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
لااااااااااا ... انت أكيد بتهزر وبتعمل الشويتين بتوعك دول علينا ..
بس ما حدش قالك قبل كدة إن هزارك بقى بايخ أوي وتقيل ؟!
مع إن عمر ما كان هزارك انت بالذات بايخ أو تقيل ..!!
يعني إيه يا #عمار ؟!
هو انت مش بتفتح عينيك ليه ؟! جسمك ساقع في الحر ده ليه ؟!
كل الناس الـ كانت واقفة تحت بيتك دي ، كانوا واقفين هناك ليه ؟!
هو انت بجد مت خلاص زي ما بيقولوا ومش هنشوفك تاني ؟!
هو انت الـ كنت في الكفن الـ شلته بإدية ده ولا كان واحد غيرك الـ فيه ؟!
طب مت ازاي وانت صورتك ما بتفارقش حلمي وخيالي ؟!
الكلام ده بجد يا #عمار ؟! يعني إيه ؟! أصل أنا مش فاهم !!
يعني إيه يا #عمار ؟!
بالله عليكم حد يفهمني طيب ..
مش كنتوا بتقولوا في جنازته وتهتفوا :
" انهارده الليلة عيد .. #عمار مات شهيد "
طب هو الهتاف هيجيبلنا #عمار جديد ؟!
ردوا عليا ..!!
الهتاف هيجيبلنا حق #عمار من العبيد ؟!
ساكتين ليه ؟! ما تتكلموا !!
مش انتوا الـ كنتوا واقفين معاه بتهتفوا ؟!
ولا المرة دي كنتوا واقفين بعيد ؟!
أنا عن نفسي مش مستوعب ولا قادر أصدق الحصل لحد دلوقتي ..
صداع هيفرتك دماغي ومش قادر أوقفه ولا أفوق منه خالص ..
وصورتك الـ قدامي دي مش راضية تفارقني ..
أنا فاكر كويس أوي لما قلتلك أنا ما بحبش أروح عزا ..
ولا عمري حضرت غير 3 أو 4 جنازات في حياتي ..
ما كنتش متخيل ولا في أسوء كوابيسي ..
إني ممكن أحضر جنازتك بدري كدة وآجي آخد عزاك !
لكن وبعد كل ده ما نقدرش نقول إلا الـ يرضي ربنا ..
" إن العين لتدمع وإن القلب ليحزن وإنا على فراقك يا #عمار لمحزونون "
" إن العين لتدمع وإن القلب ليحزن وإنا على فراقك يا #عمار لمحزونون "
" إن العين لتدمع وإن القلب ليحزن وإنا على فراقك يا #عمار لمحزونون "
للتواصـــل
مدونتي الخاصة :
www.Mido7Cr.blogspot.com
: صفحتي على
FaceBook : www.Facebook.com/MC.AHmaDTwitter : www.Twitter.com/Mido_CR7
صفحة الاستفسارات :
Ask.fm : www.Ask.fm/MC.AHmaD
البريد الإلكتروني :
Mody.0007@Hotmail.ComMody.0007@Ymail.Com
للمحآدثة الفورية عبر الـ WhatsApp :
+201150109037 
